Fai aproximadamente un ano anunciouse en plena campaña ás eleccións municipais un paseo peonil e ciclista que uniría Pontevedra e Marín. Un paseo que permitiría unha comunicación segura entre as dúas vilas para que os cidadáns puideran facer os seus desprazamentos sen ter que usar un automóbil, unha infraestrutura que vai máis aló do que é un novo espazo de lecer.

Pontevedra e Marín son dúas vilas separadas por tan só sete quilómetros e sen desnivel, un traxecto que con unha bicicleta e a ritmo de paseo non leva nin vinte minutos pero que por culpa das infraestruturas non é seguro desprazarse cunha bicicleta.

Neste último ano abríronse múltiples frontes coa mesma temática ciclista, vía acordos plenarios e reivindicacións de asociacións e particulares. Polo camiño pediuse que os camións de ENCE teñan unha vía de servizo e entren pola PO-11 e non pola estrada vella xunto cunha mellora da seguridade viaria desta estrada  ou incluso unha cesión desta vía ao Concello de Pontevedra. Polo de agora sen máis percorrido que moitos titulares nos medios de comunicación.

O asunto parece enquistado, as posibilidades para executar unha infraestrutura son moitas e parece que é cuestión de vontade política, máis que de cuestión técnica, hai quen quere continuar o paseo da PO-11 sen tocar os carrís, hai quen quere anular un carril da PO-11, outros queren facer un carril bici na estrada vella, outros din que con modificar a estrada vella con lombos e pasar a velocidade a 30km/h xa chega. As posibilidades son múltiples, o que non se discute é que é preciso conectar Marín e Pontevedra dunha vez de forma segura para ciclistas e peóns.

 Cremos que poucas cuestións nestes anos tiveron tantos apoios de tan diferentes actores políticos, non hai un grupo municipal que non teña o seu proxecto para esta infraestrutura. Quizais de aquí veña o atraso dos ministerios de Fomento e Medio Ambiente porque unha obra menor cun presuposto ridículo para os números que manexa a administración non entendemos que escusa pode ter para non estar xa feita.

Desde Pedaladas, como levamos reivindicando esta infraestrutura desde o 2009 e sabemos o desesperadamente lento que é conseguir que unha administración faga algo, incluso estando todos os implicados de acordo; a nosa proposta foi e é facer o máis sinxelo, menos custoso, con menos impacto ao medio e incluso o que parece máis lóxico.


Adaptar a PO-11 ou mal chamada Autovía de Marín ao paso de ciclistas. Esta vía é da rede convencional xa que non é unha autovía. Ten unha utilización moi baixa, segundo os detectores que existen no punto quilométrico 1,8 esta vía normalmente usa o 7% da súa capacidade con picos do 11%. Adaptar a vía só precisaría afectar a un dos catro carrís de circulación e tería un custo mínimo, a execución duraría semanas e podería estar lista para este mesmo verán. Por isto entendemos que é un problema de vontade política.

Esta infraestrutura é primordial xa que permitiría chegar as praias de Marín, ir a facer recados dunha cidade a outra, que os traballadores do Porto que viven en Pontevedra non tiveran que usar o seu automóbil, que os rapaces das dúas cidades gañasen autonomía persoal... moitas vantaxes cuns custos mínimos pero seguimos agardando un pouco de visión e gañas dos que cada vez que hai eleccións piden a nosa confianza.

En Pontevedra respiramos aire moderadamente contaminado.

Sempre é difícil asegurar algo rotundamente, respiramos aire contaminado ou non, pois segundo a quen lle fagamos caso está ben ou causa mortos. Se usamos o criterio da UE e por extensión de España e da Xunta, que expoñen nas súas webs, o habitual é ter unha calidade do aire “Boa” ou “Admisible” na nosa cidade.
A lexislación da UE preocupase moito de non danar as empresas polo que os criterios son sempre políticos e de emprego, adaptando a saúde dos cidadáns ás necesidades das grandes empresas. Isto non sucede coa OMS que o único criterio que lle importa é a saúde pública, polo que fixa uns valores para os contaminantes atmosféricos máis exixentes.

Nunha cidade con cero falecidos por accidente de tráfico tócannos 29 mortos prematuros ao ano e máis incidencias en alérxicos e enfermos crónicos que afectan a súa calidade de vida. O problema é que a contaminación non é perceptible a simple vista polo que non crea a alarma social dun atropelo e queda obviada pola maioría da cidadanía.

Se temos que buscar culpables directos hai que mirar aos grandes emisores de contaminantes, que aínda que cumpren coa lexislación da UE deixan un aire prexudicial segundo o criterio da OMS, os nosos coches, as caldeiras de gas-oil, ENCE, ELNOSA, o tráfico marítimo do porto de Marín. Pero non quedan aí os contaminadores, só hai que acceder a sistema CALIOPE e ver como os días de vento do SUR chega incluso a contaminación de Vigo segundo o modelo matemático de dispersión . A contaminación non entende disto das fronteiras nin de termos municipais, nin se queira de provincias, no último informe de “Ecoloxistas en acción” responsabilizaba os grandes focos de contaminación de levar ao rural Galego niveis de ozono non acordes co seu tráfico rodado ou industria.

Cando vas nunha bicicleta e paras nun semáforo cunha fila de coches fumeantes a reflexión sobre a saúde, a calidade de vida e afectar o próximo aparecen de seguido. Vai sendo hora de responsabilizarnos dos nosos actos, da nosa saúde e da saúde dos nosos veciños tomando medidas para non contaminar.

Calidade do aire Xunta
Sistema CALIOPE previsión emisiones

Nesta charla se tentará dar unha visión global do estado actual da seguridade dos ciclistas, da normativa que lles afecta e do estado actual das infraestructuras no que atinxe a este tipo de mobilidade, sempre dende a perpectiva dos profesionais deste medio de transporte e das persoas que traballan pola convivencia e a seguridade viaria. Despois se abrirá unha quenda de preguntas para que os asistentes poidan poidan plantexar as cuestión que lles preocupan.

Ademais continua o ciclo de cine que se organiza xunto coa asociación Dinamo, Pedaladas e o Concello de Pontevedra. Nesta ocasión se proxectará o filme "Dia de fiesta" de Jacques Tati. Será ás 20:00 na Casa da Luz.

Dentro deste ciclo de cine todavía se proxectarán as películas "As aventuras de Pee-Wee" o 5 de maio e "A terre bicyclette" o día 12 do mesmo mes, ambas tamén na Casa da Luz.

E por último, e para rematar a xornada, a Masa Crítica de Pontevedra volta a saír ás rúas da cidade para dar un paseo conxunto pola mesma. Os ciclista xuntaránse ás 21:00 horas na praza da Peregrina e realizaran un percorrido duns 45 minutos de duración baixo o lema que define ás masas críticas de todo o mundo "Usa a bicicleta tódolos días, celébrao unha vez ó mes"

Un saúdo a tod@s.